Nagtrabaho ko sa usa ka manufacturing company. Sukad sa miaging tuig nagsige nalang ni sila sa pagpa overtime kanamo tungod kay kulang mi sa empliyado. Aduna gani panahon nga bisan kun day off namo, ila ming tawgan og patrabahuon. At first, medyo excited pa mi kay aduna mi extra income, apan karon mura di na man gyud makaya sa lawas. Dunay panahon nga kapoy na kaayo itrabaho og sobra sa walo ka oras. Nananghid ko sa among manager nga di una ko mo-overtime sud sa usa ka semana apan mibalibad siya kay di daw namo makuha ang target nga production kun di mi mag-overtime matag adlaw. Ang akong pangutana, kun mamahimo ba ko nga mobalibad sa pag-overtime sa trabaho? Daghang salamat. —Robert

Dear Robert,

Ang atong balaod nagtakda nga walo ka oras ra gyud ang trabaho sa usa ka trabahante matag adlaw. Kun mosobra gani niini sa walo ka oras kinahanglan nga bayran na ang empleyado sa orvertime pay. As a general rule, dili sab mapugos ang empleyado sa pag-overtime kun supak sa iyang kabubut-on. Gawas lang kun kini apil sa nalatid sa Article 89 sa atong Labor Code sama panahon sa emergency nga mapugos gyud ang empleyado sa pag overtime kun dunay local o national emergency, o kon gikinahanglan gyud ang pagtrabaho to prevent loss of life or property sama panahon sa sunog, baha, bagyo, linog, epidemya ug uban pang kalamidad, o kun adunay dinalian nga trabaho sa makina, ug sa mga ekipo aron kalikayan ang pagkadaut sa produkto ug pagka-alkanse sa kompaniya, o kun gikinahanglan gyud ang trabaho aron kapugngan ang pagkadaut sa mga  perishable goods, o kon nasugdan na ang trabaho ug kinahanglan gyud nga tiwason aron di maapektuhan ang operasyon sa kompaniya. Apan sa imo nga kaso, kun  kanunay nalang mo nga mag-overtime tungod kay kuwang sila og tawo dili na gyud na sala ninyo . Ang maayo nimong buhaton, imong sultian ang manager nga di una ka mo overtime sa pagtrabaho kay di na gyud makaya sa lawas. Thank you and God bless. —Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.